ភ្នំពេញ៖ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា ផ្ញើសារគោរពជូនពរនៃថ្ងៃចម្រើនជន្មាយុ គម្រប់៦៩ ឈានចូល ៧០ឆ្នាំ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។

លោក ឯម ច័ន្ទមករា ថ្លែងអបអរខួបកំណើតសម្ដេចកិត្តិព្រឹទ្ធិបណ្ឌិត ជាមួយនឹងការគោរពនិងដឹងគុណចំពោះវីរភាពសេ្នហាជាតិមាតុភូមិរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានលះបង់ចំពោះជាតិមាតុភូមិ។ លោកបានចាត់ទុកការលះបង់របស់សម្ដេចកិត្តិព្រឹទ្ធបណ្ឌិតគឺជាគំរូសកម្មភាពសេ្នហាជាតិមាតុភូមិប្រកបដោយវីរភាពដ៏ខ្ពង់ខ្ពស់មួយ។

លោក ឯម ច័ន្ទមករា បានលើកឡើងថា៖ «សម្ដេចកិត្តិព្រឹទ្ធបណ្ឌិត បានលះបង់ជាច្រើនក្នុងកិច្ចការងារមនុស្សធម៌ ដើម្បីជួយប្រជាជាតិកម្ពុជាឱ្យរួចផុតពីទុក្ខលំបាក សេចក្ដីស្រេកឃ្លាន រងគ្រោះធម្មជាតិ គ្រោះមហន្តរាយផ្សេងៗ និងបានជួយឧបត្ថមដល់ទុរគតជនចាស់ជរាគ្មានទីពឹង កុមារកំព្រារងគ្រោះ ស្ដ្រីមានវិបត្តិ ជាពិសេសជនមានពិការភាព ដោយគ្មានការរើសអើង ព្រមទាំងបានជួយឧបត្ថមនូវថវិកាយ៉ាងច្រើនជូនរាជរដ្ឋាភិបាលកម្ពុជាក្នុងការទប់ស្កាត់ការរីករាលដាលនៃជំងឺកូវីដ-១៩ ក្នុងព្រះរាជាណាចក្រកម្ពុជា»។

ទន្ទឹមនោះ លោក ឯម ច័ន្ទមករា គោរពជូនពរ សម្តេចកត្តិព្រឹទ្ធបណ្ឌិត ព្រមទាំងក្រុមគ្រួសារ សូមប្រកបដោយសុខភាពល្អបរិបូរណ៌ កម្លាំងមាំមួន ដើម្បីបន្តដឹកនាំស្ថាប័នកាកបាទក្រហមកម្ពុជា និងថែរក្សាសុខសន្តិភាព ជាម្លប់ដល់កូនចៅ ព្រមទាំងសមប្រកបតែនឹងព្រះពុទ្ធពរទាំងបួនប្រការគឺ: អាយុ វណ្ណៈ សុខៈ ពលៈ កុំបីឃ្លៀងឃ្លាត។

សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន កើតនៅ ថ្ងៃទី១៥ ខែធ្នូ ឆ្នាំ១៩៥៤ ជាកូនកសិករក្នុងឃុំរកាខ្នុរ ស្រុកក្រូចឆ្មារ ខេត្តកំពង់ចាម (បច្ចុប្បន្នជាផ្នែកនៃខេត្តត្បូងឃ្មុំ)។ សម្ដេចបានរៀបអាពាហ៍ពិពាហ៍ជាមួយសម្ដេចតេជោ ហ៊ុន សែន នាថ្ងៃទី៥ ខែមករា ឆ្នាំ១៩៧៦ ក្នុងរបបកម្ពុជាប្រជាធិបតេយ្យ។

សម្ដេចបានក្លាយជាប្រធានកាកបាទក្រហមកម្ពុជានៅ ថ្ងៃទី៣០ ខែមេសា ឆ្នាំ១៩៩៨ ដែលបានបន្តបេសកម្មមនុស្សធម៌ជួយដល់ពលរដ្ឋកម្ពុជារហូតមកដល់បច្ចុប្បន្ន៕